Улюбёнае беларускае шоу ўжо не аднаго пакалення беларусаў «Падарожжы Дылетанта» абвясціла аб вяртанні. Юрась Жыгамонт зноў выправіўся ў вандроўку па гасцінцах Беларусі!
Новы выпуск праекта прысвечаны Гервятам. З экранаў зноў гучыць фірменнае вітанне вядоўцы:
«Шаноўнаму панству, дзень добры!
Мы зноў у падарожжы. А хто ў падарожжы бывае, той разум набывае.
Гэта, шаноўнае панства, мястэчка Гервяты, што ў Астравецкім раёне Гродзенскай вобласці. Раней Вялікае Княства Літоўскае, а цяпер – Рэспубліка Беларусь».
Юрась Жыгамонт у саламяным капелюшы ў белым, летнім убранні распавядае пра гісторыю мястэчка на фоне неверагодных краявідаў.
Каманда адзначае, што выпускі будуць з’яўляцца штотыдзень.
Вяртанне ўлюбёнага праекта гледачы сустрэлі з захапленнем:
«Дзякуй вялікі, спадар Жыгамонт! Вельмі прыемна было ўбачыць Вас!»
«…як я сумую па гэтым найважнейшым, найлепшым праекце…Як вы жывеце сёння, паважаны аўтар? Здароўя!»
«Пан Юры! Гэта неперадаваемая радасць бачыць НОВЫ выпуск падарожжаў. Я, шчыра кажучы, ўжо і не спадзяваўся… Для мяне вы беларускі супергерой, сьвет у начы, маяк сярод бушуючага мора! У гэтыя часы вы патрэбны як ніколі! Калі сум па Радзіме становіцца нясцерпным, толькі вашыя падарожжы могуць залячыць маё сэрца і душу! Тысяча падабаек вам ад мяне! Вы сапраўдны сын нашае любімае Радзімы!»
Праект быў на паўзе некалькі гадоў.
Падпісвайцеся на культурныя навіны Reform.news у Telegram